Forráðamenn Lindex á Íslandi hafa ákveðið að opna nýja glæsilega 400 fermetra verslun í miðbæ Selfoss næsta sumar verði deiliskipulag samþykkt. Samningur þess efnis hefur verið undirritaður af hálfu Sigtúns Þróunarfélags og forráðamanna Lindex. Lindex er ein stærsta tískufatakeðja Norður Evrópu með um 500 verslanir í 16 löndum. Lindex býður upp á tískufatnað fyrir konur, undirföt, snyrtivörur og fylgihluti sem og fatnað á börn og unglinga á hagkvæmu verði. Gera má ráð fyrir að um 6-8 ný störf skapist hjá Lindex við nýju verslunina á Selfossi.
Verslunin verður staðsett í húsum byggðum skv. útliti Edinborgarhússins sem var áður í Hafnarstræti í Reykjavík og Hótel Björninn sem stóð í Hafnarfirði við hliðina á þar sem A. Hansen stendur í dag. Verslunin mun bjóða allar þrjár meginvörulínur Lindex og verður byggð upp með nýjustu hönnun Lindex verslana sem leit fyrst dagsins ljós í London. Hönnunin byggir á björtu yfirbragði, ólíkum litbrigðum hvítra lita og svartra auk viðar sem gefur versluninni skandínavískt yfirbragð. Verslunin mun því draga saman hið gamla útlit eldri endurbyggðra húsa og hið nýja útlit verslunarinnar með hætti sem á sér hvergi hliðstæðu.
"Það er frábær tilfinning að vera loksins að koma aftur heim á Selfoss og opna hér Lindex verslun. Hugmyndin að stofnun Lindex á Íslandi má einmitt rekja til þess þegar við bjuggum hér og ég var í fæðingarorlofi með miðjubarnið okkar. Þá fann ég fyrir því hversu mikil þörf var fyrir góð barnaföt á góðu verði, síðan eru liðin rúm 8 ár og hér erum við komin aftur. Sveitungar okkar hafa verið duglegir að koma og versla við okkur í Reykjavík en nú aukum við þjónustuna enn frekar við Sunnlendinga og færum okkur nær þeim þangað sem þetta allt byrjaði“ segir Lóa D. Kristjánsdóttir, umboðsaðili Lindex á Íslandi
Lindex leggur mikla áherslu á samfélagslega ábyrgð og virðingu fyrir því hvernig varan er framleidd þ.e. umhverfið og fólkið sem framleiðir vöruna og þetta endurspeglast í stöðugt auknu framboði vara framleiddum úr lífrænni bómull. Fyrirtækið hefur einsett sér að 80% af framleiðslunni verði framleitt með sjálfbærum og umhverfisvænum hætti fyrir árið 2020. Í haust kynnti einnig Lindex möguleika til að endurnýta fatnað með því að skila til verslunarinnar og verða umbunað með inneign í gegnum aðild að vildarklúbbnum More at Lindex. Langstærstur hluti af barnalínu Lindex er framleiddur úr lífrænni bómull og endurunnum efnum og við hönnun eru þarfir barnanna í fyrirrúmi. Fyrirtækið vinnur einnig gegn kynjamisrétti í fátækustu ríkjum heims og hjálpar konum að sækja sér menntun og heilbrigðisþjónustu í gegnum verkefni eins og HERproject og WEWomen by Lindex.
”Það er okkar meginmarkmið að miðbærinn muni þjóna aðallega tvíþættu hlutverki, verði miðpunktur verslunar og viðskipta fyrir Sunnlendinga um leið og að vera áfangastaður fyrir þá fjölmörgu gesti sem leggja leið sína hingað á Selfoss. Það að fá Lindex í lið með okkur í þessari viðleitni er frábært skref fram á við”, segir Leó Árnason, frkv.stj. Sigtúns Þróunarfélags
Húsin sem munu hýsa Lindex, verði deiliskipulagið samþykkt, hafa sérlega áhugaverða sögu en um 100 ár eru síðan fólk leit Edinborgarhúsið augum en það fórst í eldsvoðanum mikla árið 1915 þegar vefnaðarvörudeild Edinborgar var þar starfandi. Húsið var þekkt sem viðkomustaður fjölmargra í verslunarhugleiðingum eftir vefnaðarvöru og gegndi því hlutverki fram á síðasta dag eða allt frá árinu 1854.
Hótel Björninn var upphaflega byggt árið 1906 og hýsti meðal annars veiðarfæradeild Kaupfélags Hafnarfjarðar en húsið var rifið árið 1966 þegar gatan sem liggur framhjá A. Hansen í Hafnarfirði var breikkuð.